Skip to main content
Gaylan Media
DEG DEG

Howlgalka Banooda- Buurhakaba ilaa Baydhabo "LEEGO"

Hawlgalka loogu magac daray Hawlgalka Banooda, waxaa la dajiyey qorshihiisa oo la ebyay 22kii bishan October, waxaana kuwajahan yahay in lagu qabto degmada Buur Hakaba iyo gobolka Baay, Taliska ciidanka xoogga dalka ayaa labo madax u qeybiyey howlgalkan oo ay ka qeybgalayaan in ka badan 3 guuto oo ciidamo ah, iyadoo hadafka yahay in laga adkaado dhinaca ciidanka Laftagareen.

Baahin Bilow ah · 5 days ago

Wadaag: Twitter Facebook LinkedIn

Cusbooneysiin toos

  1. 2 days ago09:38 GMT

    SHABEELAHA HOOSE oo ay ciidamada AUSSOM ka baxayaan!

    Afar kamid ah rugaha gobalka Shabeelaha Hoose & Saldhigyada waa weyn ee ay lahaayeen ciidamada Midowga Afrika ayaa la qorsheynayaa in 2da todobaad ee soo socda dhimis xoogan iyo bixitaan ay ka sameeyaan ciidamada AU.

    Sida ay Gaylan Media u xaqiijiyeen ilowareedyo wargal ah goobaha ugu muhiimsan ayaa noqon doona afar aag oo xasaasiyad weyn u leh daganaanshaha caasumada ilaa magaalooyinka muhiimka ah ee gobalka, iyadoo ay dowladda Faderaalkuna ciidamado kusoo daabulayso.

    Baraawe oo ah caasumad gobaleedka Koonfur Galbeed, aanse lagu shaqeynin ayaa ka mid noqonaysa goobaha ugu horeeya ee laga guurayo, Shalanbood ilaa Caanoole ayaa qeyb ka ah qorshaha cusub, iyadoo marba qeyb ay bixi doonto.

    Howlgalka Midowga Afrika ayaa haysta 12 bilood oo bixitaan ah, kaas oo dhaqaale ahaan aan loo haynin, waxaana daganaansho la`aanta siyaasaddu ay keentay burburka ku yimi geedi socodka dhinaca amniga ah, iyadoo howlgalkii Leego uu wali dhaqaaqi la`ayahay wixii ka dambeeyey markii ciidanka dowladda dib loo riixay.

    Machadka Daraasaadka Amniga ee Balqiisa Insights ayaa ka digay in xil-wareejin degdeg ah oo dhinaca amniga ah ayna sameeyaan ciidanka Midowga Afrika ay ka dhalan karo firaaq amni, taas oo ay ka faa'iideysan karto kooxda AS, gaar ahaan meelaha ay kooxdu isku dayayso inay dib ugu xoogaysato ee gobalka Shabeelaha Hoose.

    "In ciidamada Soomaaliyeed lagu wareejiyo masuuliyado amni oo ka badan awooddooda hawlgal iyo taageerada ay haystaan waxay halis gelin kartaa guulihii laga gaaray dagaalka AS, dib-u-dhacyadii amni ee dhacay sannadkii 2025, gaar ahaan deegaanno horay looga wareejiyey ciidamada ATMIS, ayaa muujiyey in la wareegidda deegaan aysan keligeed ka dhignayn in amnigiisa la sugi karo"ayaa lagu yiri warbixinta Machadka Balqiisa soo saartay.

  2. 3 days ago11:14 GMT

    DEG DEG: Aaden Madoobe oo qabtay kulan aan caadi aheyn.

    Maalmo uun uu dhaqaaqi ka;ayahay howlgalka Banooda ee isku furida Baydhabo & Buurhakaba, ciidanka dowladdana weerarkii Leego ka dib ay ku laabteen Balidoogle, haddana madaxweynaha KG Aaden Max'ed Nuur "Aaden Madoobe" ayaa maanta la arkay isagoo xiran direyska ciidamada Milateriga, kulan aan caadi aheyn oo uu shir gudoomiyey ayuu ku amray qaadida howlgalo amni sida ay sheegtay madaxtooyada Baydhabo.

    Aaden Madoobe ayaa sheegay in ay doonayaan in degmooyinka gacantooda ka maqan sidii ay ula soo laaban lahaayeen, kuwaas oo ay dhawaan qabsadeen ciidanka Laftagareen, hayeeshee dowladda Faderaalka iyo Koonfur Galbeed ay ku doodeen in ay wehliyeen dagaalamayaal katirsan Al Shabaab, laakiin lama helin xaqiijin madax banaan.

  3. 4 days ago15:48 GMT

    "Haddii aadan 18 sano dhisin ciidan Soomaaliyeed, MW Dhab ah ma tihid" XIldhibaanada Uganda oo la hadlaya XSM

    "Haddii aad guursato aabaha kuma daryeeli karro qoyskaaga/adiga inta ka dhiman noloshaada, 18 sano kadib oo ciidankeena joogay Somalia nooma sheegi kartid in aadan dhisin ciidan & iskaashiga aad ku ilaalin lahayd dalkaaga, markaas adigu ma tihid madaxweyne dhab ah" Xildhibaano ka tirsan baarlamaanka Uganda oo dhaleeceynaya dalabka Villa Somalia ee ah in ciidanka Uganda sii joogaan Muqdisho ilaa xayndaabkeeda.

    Warbixintan oo laga sii daayay TV-ga NBS ee Uganda, ayay xildhibaanadu si weyn ugu maageen karaanka Soomaaliya ee isku filnaanshaha amnigeeda iyo dalabkooda, waxaana lagu beegay bixitaanka ciidanka Uganda iyo safar kasoo laabashadii MW Xasan Sheikh.

  4. 4 days ago15:34 GMT

    "Haddii ciidanka Ugandha baxaan ma joogi karro Kursiga Villa Somalia" XSM

    Xildhibaano katirsan baarlamaanka Uganda oo la hadlayay TV-ga NBS TV ee laga leeyahay Uganda ayaa sheegay in madaxweyne Xasan Sheikh u sheegay in joogitaanka ciidanka Uganda ee Soomaaliya uu yahay mid muhiimad weyn ugu fadhiya Soomaaliya, la'aantoodna uusan sii ahaan karin madaxweyne.

    "Madaxweynaha Soomaaliya wuxuu xildhibaanadeena baarlamaanka Uganda u sheegay inuu joogitaankiisa xaafiiska kuxiran yahay joogida ciidanka UPDF, Wuxuu kaloo caddeeyay in maalinta ay ciidamada UPDF Soomaaliya ka baxaan ay u badantahay inuusan sii ahaan doonin madaxweyne" Xildhibaan ka tirsan baarlamaanka Uganda oo si toos ah u qiray in MW Xasan Sheikh sidaas u sheegay xildhibaanada Uganda.

    Taageerayaasha Villa Somalia waxay sheegayaan in aan loo baahneyn AUSSOM iyo UNTMIS, laakiin madaxweynuhu wuxuu dunida u sheegayaa in uusan xukunka Muqdisho sii joogi karin haddii ay baxaan ciidamada Shisheeye oo aan hadda dhaqaale loo haynin!.

  5. 5 days ago18:59 GMT

    Villa Somalia oo xirtay Saraakiishii dagaalkii LEEGO!

    Dowladda Faderaalka ayaa galabtay keentay Muqdisho saraakiishii hogaaminaysay madaxa 1aad ee howlgalkii Banooda, waxaana lagu eedeeyey dayacaad iyo masuuliyad darro la xariirta in ay ciidan & Gaadiid uga carareen fagaaraha dagaalka, sida ay xaqiijinayaan ilowareedyo wargal ah oo ay lahadashay Gaylan Media.

    Xubnaha lakeenay, haddana eedahan loo jeediyey ayaa kala ah 1- Taliye kuxigeenka qeybta 12ka April, ahaana ninkii ugu sareeyey madaxa 1aad sida ku qoran warqada amarka dagaalka ee la bixiyey 22kii bishan.

    2- Laba taliye urur Guutada 12 ka April ah,

    3- Laba taliye urur Guutada 17,aad Gor Gor ah.

    4- Taliye kuxigenka Guutada 17,aad Gor Gor.

    5- Laba Taliye urur Guutada 16,aad Danab ah.

  6. 5 days ago17:27 GMT

    XSM oo sheegay in Turkiga u balan qaadeen joogid xukun ilaa amniga Muqdisho

    “AS ma qabsanayaan Muqdisho, Turkiga i balanqaaday in aysan taasi dhaceynin” MW Xasan Sheikh.

    Source: Bloomberg

  7. 5 days ago17:16 GMT

    Villa Somalia oo weerartay Xildhibaano

    Shan mudane baarlamaan oo katirsan golaha shacabka kana soo jeeda Koonfur Galbeed iyo Puntland, kana aragti duwan Villa Somalia ayaa baaburtoodii ay ka qaateen ciidan katirsan NISA, iyagoo sidoo kale gacan qaad kusameeyey.

    Xildhibaanada qaarkood ayaa sheegay in ficiladan lamid yihiin kuwii 1991dii ee bililiqeysiga waqtigii burburka dowladnida dalka.

  8. 5 days ago13:31 GMT

    BALADWEWEYNE oo ka baxday gacanta Hirshabelle

    Warar ka imaanaya Baladweyne ayaa sheegaya in ay ciidan hubaysan oo ay wataan ganacsato & xubno diidan Hirshabeelle ay la wareegeen xaruntii Lamagalaay ee maamulka gobolka Hiiraan.

    Agaasimihii hore ee NISA Cabdullaahi Sanbaloolshe ayaa maalmo kahor u sheegay Gaylan Media in uu abuuray Hirshabeelle cusub oo haysata aqbalka bulshada deegaankiisa, wixii intaas ka dambeeyeyna abaabul xoogan ayaa kasocday Baladweyne.

    Tani waxay muujinaysaa culeyska kale oo Villa Somalia ka qabsanaya gobalka Hiiraan, iyadoo la dhiban Howlgalka Koonfur Galbeed, una hanqal taageysay Marka-Shabeelaha Hoose.

  9. 5 days ago13:26 GMT

    Ciidan dheeraad ah ayaa loo qaaday Balidoogle

    Dowladda Federaalka ayaa ciidan kale u qaaday Balidoogle, si loogu biiriyo colalkii Howlgalkii Banooda dib uga soo laabtay, waxaana la bilaabay aruurinta xog, Saad iyo qorsheyn cusub, iyadoo wali khasaaraha kordhayo.

  10. 5 days ago10:37 GMT

    DFS oo ku dhawaaqday in dagaalka Koonfur Galbeed, dalal Shisheeye soo galen!

    Taliska ciidanka xoogga dalka ayaa ku dhawaaqay in dagaalkii Leego & kan ay kula jiraan kooxaha Argagixiso uusan kaliya ku koobneyn jihadaas, ee ay qeyb ka yihiin dalal Shisheeye, sida uu sheegay Taliyaha ciidanka Lugta oo la hadlayay Askartii kasoo laabatay dagaalkii Leego.

    Dowladda Faderaalka ayaa todobaadkii hore la kulantay weerar xoogan oo dib looga riixay aaga Leego, kalifayna in dibu abaabul loo galo in markale la aado howlgalka Banooda, oo ilaa hadda aruurinta ciidamada dhexda looga jiro.

    Madaxweyne Xasan Sheikh ayaa todobaad kahor amray duulaanka lagu qabsanayay Buurhakaba oo ay ahayd halkii ay dowladda faderaalka horey March sannadkan uga qabsatay Laftagareen.

  11. 5 days ago09:16 GMT

    Al Shabaab oo guul sheegatay!

    Kooxda Al Shabaab oo ka hadashay dagaalkii Leego ayaa sheegtay in ay qabsadeen in ka badan 10 baabuurta dagaalka ah, sidaas oo kalena ay dileen 321 Askari oo katirsan ciidamada dowladda Faderaalka, halka ay Maxaabiis dhan 15 Askari sheegeen in ay ku dhinteen duqeyn diyaaradaha Turkida fuliyen.

    Dowladda ayaa beenisay sheegashada Al Shabaab, waxayna sheegeen in aysan waxba ka jirin, sida ku cad diwaangalin hordhac ah oo khasaaraha ayaa sheegaya 50 askari kabadan ku dhinteen dagaalkii Leego, ayna wali maqan yihiin tiro kale oo askar ah.

  12. 5 days ago09:02 GMT

    UGANDA oo ku dhawaaqday in ay ciidankeeda la baxayso!

    Taliyaha Ciidanka Uganda, Jeneraal Muhoozi Kainerugaba, ayaa sheegay in la bilaabay ka bixitaanka ciidamada Uganda ee ku sugan Koonfurta Soomaaliya.

    Wuxuu xusay in kaddib 20 sano oo dhiig iyo naf-hurnimo ah, Uganda ay amniga Soomaaliya ku wareejinayso ciidamada SNA.

    Tallaabadan ayaa muujinaysa isbeddel weyn oo ku yimaada doorka ciidamada Uganda ee Soomaaliya, iyadoo dood adag kataagan tahay karaanka ciidamada DFS.

  13. 5 days ago07:31 GMT

    Dowladda Faderaalka oo markale awoodeeda Buurhakaba ku tijaabinaysa

    Dowladda Federaalka ayaa ku adkeysanaysa in ay markale sii wadayso howlgalkii Banooda ee qabashada Buurhakaba, waxaana maanta loo hanjabay darawaladii wadey gaadiidka culus ee lagu qaatay duulaankii dhacay.

    Sidaas oo kale ciidan dheeraad ah ayaa lagu biirinayaa ciidamada kasoo haray weerarkii maalmo kahorka ahaa, iyadoo diyaarado dagaal kahor duqeymo ay fulinayaan.

    Sida kamuuqata shaxda cusub oo ay heshay Gaylan Media wali waxba lagama bedelin tagtadii, howlgalka ama amarkii dagaal ee 22kii bishan soo baxay, kaliya waxaa lagu kordhiyey in la xoojiyo Madaxa 2aad ee howlgalka oo ah Baydhabo colalka jooga.

    Maxkamadda ciidamada ayaa ku hanjabtay in askarigii carara laga talaabo qaadi doono, iyadoo sheegtay in ay baadigoobayso askar maqan, darawalada ayaa lagu eedeyeey in ay baabuurta la baxsan waayeen. Qaar kamid ah Askartii ka qeybgalay dagaalkii u dambeeyey ayaa xaqiijiyey in Drone, 4 baabuur qarax ah iyo dagaal toos ah halmar ay wada qabsadeen, ayna waayeen gurmad hawada ah.

  14. 5 days ago07:14 GMT

    10kun oo askari oo katirsan SNA oo aan Mushahaar helin

    Sida aan hore u tabinay 27-kii Sebtembar, ku dhawaad 10,000 oo askari ayaan Mushahaar bishan helin, iyadoo ay saameysay hirgelinta nidaamka cusub ee Suul-saarka, iyadoo October dhammaad tahay, walina aan cabashadooda laga jawaabin.

    Ciidamada ay arrintani saameysay ayaa u badan Qaybta 27-aad ee Hiiraan, Qaybta 21-aad ee Galmudug, Qaybta 60-aad ee Koonfur Galbeed iyo Qaybta 1-aad ee Kumaandooska Gorgor.

    Ilowareedyo wargal ah ayaa u sheegay Gaylan Media, in lacagaha halkan laga jaray gacan kadhiib lagu siiyey ciidamo u daacad ah madaxweyne Xasan Sheikh iyo kuwa dano siyaasadeed loogu abuuray meelo ka baxsan Koonfurta dalka.

  15. 5 days ago07:13 GMT

    Uganda oo ciidankeeda kusugan Shabeelaha Hoose la baxaysa, ka dib Leego!

    Ilowareedyo amni oo ka tirsan Hay'addaha dowladda Federaalka ayaa u sheegay Gaylan Media in ay ciidamada AU kuwargaliyeen in ay sadex aag oo ka mid ah saldhigyadooda gobalka Shabeelaha Hoose baneyn doonaan, wixii loo gaaro horaanta bisha nagu soo wajahan November ayna tahay in ay isku diyaariyaan ciidanka SNA sidii ula wareegi lahayd.

    Dhimida ciidamada Shisheeye ayaa bilaabanaysa November, iyadoo kuwa ugu badan ee Uganda laysku keeno doono xeyndaabka caasumada Muqdisho, si gaar ahna Xerada Xalane iyagoo noqon doona ciidanka u dambeeya ee halkaas joogaya ilaa howlgalku cimri dhameysanayo.

    Qorshaha ayaa ahaa in 2 sano ka hor amniga Koonfurta dalka ay la wareegaan xoogaga amni ee DFS, caalamkuna quudinayay tobanaankii sano ee la soo dhaafay, laakiin dowladda Federaalka ayaa sheegaysa in aysan laheyn karaan isku filan oo halmar amniga ku xaqiijin karto

  16. 5 days ago07:13 GMT

    Museveni oo ciidankiisa kusugan Shabeelaha Hoose la baxaya?

    Sida ay Gaylan Media u xaqiijiyeen ilowareedyo diblumaasiyadeed, madaxweyne Xasan Sheikh ayaa ka helay dhigiisa Uganda dhambaal si cad u qeexaya in aysan Kampala ciidamadeedu sii joogi doonin koonfurta dalka oo ay bilaabayaan bixitaan qeyb-qeyb ah, ayna ka baxayaan deegaano kamid ah Shabeelaha Hoose oo ay hadda amnigooda gacanta ku hayaan.

    Xogta aan helnay ayaa cadeynaysa in Uganda si aan gabasho laheyn u sheegtay in madaxweyne Xasan Sheikh dalka galiyey dagaalo Sokeeye oo kalifay in kooxaha Argagixiso ee mudada dheer lala dagaalamayay ay fursad ka dhex helaan, ayna adag tahay in ciidanka AUSSOM ay sii joogaan, maadaama aan dhaqaale la haynin, khatartuna ay kordhayso.

    Agaasimihii hore ee NISA Cabdullaahi Sanbaloolshe oo u waramayay Gaylan Media ayaa sheegay in haddii bixitaan ah hal deegaan ah uu dhaco ay ka dhigan tahay burbur ku imaanaya amniga koonfurta dalka, ayna halis weyn ka dhalanayso oo ay gobalada Shabeelooyinka gacan cadow ku dhacayaan.

    Hoos u dhigida tirada AUSSOM 10% ayaa bilaabatay, waxaana deegaanada cabsida ugu badan laga qabo ay tahay 2da Shabeelle, oo bixitaanada u horeeya ka dhici doonaan deegaanka Buula-Mareer ayaa durba laga arkay calaamado muujinaya bixitaanka Uganda ciidankeeda.

  17. 5 days ago07:12 GMT

    DFS oo qiratay in gaadiid dagaal laga gubay

    Dowladda Faderaalka oo markii 1aad ka hadashay dagaalkii deegaanka Jameeca ayaa sheegtay in la dilay 75 Argagixiso, 56 la dhaawacay, iyadoo qirtay in baabuur waxyaabaha qarxa ka buuxan lagu weeraray gaadiidka ciidanka xoogga, taasna ay khasaare gaarsiisay baabuur ciidan.

    Dowladda ayaa qirtay in howlgalka magaciisa uu yahay Banooda, kaas oo ay sheegtay in ay sii wadi doonto ilaa laga gaarayo isku furka waddooyinka isku xiraya Wanla-weyn-Buurhakaba ilaa Baydhabo.

    Kasokow warka dowladda, haddana sida ay ogaatay Gaylan Media, Taararka xog-waranka ee yaala Taliska ayaa aad uga duwan tan wasaaradda gaashaandhigu shaacisay, iyadoo wali khasaaraha uu sii kordhayo.

  18. 5 days ago07:11 GMT

    Isbitaalka Xoogga dalka oo Musiibo heerka 5aad ah diwaangaliyey

    Sida lagu amray kooxda shaqaalaha Isbitaalka Xoogga dalka ee Muqdisho ayaa muujinaya in lagu dhawaaqay heer musiibo ama xaalad degdeg ah oo aad u culus gaarsiisana 5 “Disaster Level 5”, iyadoo shaqaalaha caafimaadka loogu yeeray qaybta gargaarka degdegga ah (ER).

    Farriimaha ayaa Shaqaalaha lagu amray soo galid shaqada ah, Arrintan ayaa imaanaysa kadib dagaalkii culus ee ciidamada dowladda iyo kooxda Argagixiso ku dhexmaray agagaarka Leego gobalka Shabeelaha Hoose, halkaas oo khasaare xoogan ka dhashay.

    Madaxweyne Xassan Sheikh ayaa wali ku mashquulsan helitaanka xog sugan, warbixinaha la geeyey ayaa kale duwan ilaa hadda, Taliyayaasha colalka ee sare ayaan wali gudbin kama dambeys xog ah, iyadoo durba dood ka dhalatay maareynta howlgalkii maanta oo qeyb ka ahaa Howlgalka Banooda ee 22kii bishan uu xaqiijiyey G/Le Dhexe Maxfuud Cabdimajiid Xaaji Axmed oo ah Madaxa Hoggaanka Guud ee Hawlgelinta Ciidanka XDS, uuna ogolaaday fulintiisa S/ Gaas Ibraahim Maxamed Maxamuud oo ah Taliyaha Ciidanka XDS, kana kooban 8 bog, ayna fuliyayaal ka ahaayeen.

    1- Taliyaha Guud ee howlgalka, G/Sare Cadow Maxamed Sahal, Madaxa Waaxda Kormeerka Ciidanka Dhulka XDS.

    2- Madaxa 1-aad (Balidoogle–Buurhakaba): G/Sare Axmed Cabdi Cali (Axmed Gaashaan), Kuxigeennada G/Le Xasan Daahir Xasan, Kaaliyaha Guutada 17-aad, Qaybta 1-aad ee Kumaandooska Gorgor.

    3- Madaxa 2-aad (Baydhabo–Daynuunay): G/Le Cabdule Isaaq Ibraahim, Taliyaha Guutada 10-aad. Kuxigeenkiisa waa G/Le Xuseen Salaad Ibraahim (Moolif), Taliyaha Guutada 17-aad, Qaybta 1-aad ee Kumaandooska Gorgor.

    Tiradda dhaawacyada lakeenayo ayaa kordhaysa, qaarkood ayaa sababo amni wali loogu hayaa saldhigyada ciidamada ee Shabeelada Hoose.

  19. 5 days ago07:11 GMT

    Turkiga oo diiday in ay Hawada ka caawiyaan ciidanka weerarkii Leego

    Faahfaahinta dheeraad ah oo ay heshay Gaylan Media ayaa sheegaysa in galabta markii xaaladu dagaalka adkaatay, hoggaanada ciidankuna dalbadeen gurmad dhanka hawada ah ay waayeen sidii ay filayeen, oo sabab looga dhigay Hawada oo xun.

    Subaxnimadii hore ayay labo goor gantaal tuureen diyaaradaha Turkida, kuwaas oo ay kusheegeen in ay wadada fureen oo ay gaadiid qaraxyo wada burburiyeen, taasna ku dhaqaaqeen colalka oo kolonyo xoogan ahaa.

    Kulamo dhacay saacadihii u dambeeyey kuna qabsoomahay xarumaha TurkSom ee Turkida iyo Barta hagida howlgalada ee Xalane Muqdisho ayaa lagu wadaagay macluumaad amni, oo ka qeybgalayaashii qaarkood xaqiijiyeen in ay xasaasi ahaayeen.

    Sababta loo bixiyey amarka dhaqaaqa colalka ayaa wali dood ka taagan tahay, xili xataa waqtiga galin dambe ku dhawaaday.

    Dowladda ayaa wali hadlin, iyadoo ciidamadii kasoo baxay aaga dagaalka ay Jidgooyo kale kudhaceen, waxaana xog cusub oo madaxweynaha lala wadaagay au kaliftay kulan deg deh ah oo amni in la qabto.

  20. 5 days ago07:10 GMT

    Xasan Sheikh oo lala wadaagay Macluumaad cusub

    Sida ku cad warbixin amni oo Hay’addaha amniga la wadaageen madaxweyne Xasan Sheikh, ayna heshay Gaylan Media, loogana warbixinahay weerarkii ka dhacay deegaanka Aw-Yasiin, oo qiyaastii 3 km u jira Leego, ayaa lagu xaqiijiyey in ay kooxaha Argagixiso adeegsadeen diyaarad Drone oo is qarxinaya, kuwa Qarax tuuraya iyo baabuur miineysan.

    Noocyada Drone-ta oo sadex qeybood laga dhigay, waxaa lagu sheegay kuwa aan horey dagaalada loogu adeegsan, loogana filaynin gacanta kooxdan Argagixiso.

    Tirada dhimashada ee la sugay oo lagu sheegay hordhac ayaa warqada lagu sheegay 74 askari, burburka gaadiidka culus ayaa laga dhigay 12 baabuur oo ay kujiraan baabuurta Beebayaasha nooca Kibriga ee Turkidu bixiyeen, saad, gaadiid xamuul ciidan iyo kuwa culus.

    Sida ku cad xog-waranka amni waxaa lagu sheegay in dagaalka uu socday 2 saacadood, ay dhinteen saraakiil Ururada qaar heystay, xeelad ciidan ayaana lagu tilmaamay soo gaarida Balidoogle agagaarkiisa oo markale dagaal ka dhacay.

  21. 5 days ago07:09 GMT

    Weerarkii Leego!

    Ilowareedyo hay’addaha amniga ee Soomaaliya katirsan ayaa u sheegay Gaylan Media in tiro ka badan 8 oo kamid ah gaadiidka culus oo ay Turkidu bixiyeen ay kuburbureen dagaalkii Jameeco kadhacay galabta, qaarna la qaatay, baabuurta xamuulka iyo saad fara badan oo howlgalku lahaa ayaa burburay, taas oo muujinaysa jug culus oo dhacday, hayeeshee dowladdu ilaa hadda ma bixin Tafaasiil.

    Sida ku cad Hawlgalka oo loogu magac daray Hawlgalka Banooda, laguna qabanayay degmada Buur Hakaba iyo gobolka Baay, ayaa lakulmay dibu dhac gaar ahaana Madaxa 1-aad ee hawlgalka, oo ahaa Balidoogle–Buur Hakaba, waxaa hoggaaminayay G/Le Sare Axmed Cabdi Cali (Axmed Gaashaan), kaas oo hadda gaaray saldhig kuyaala Shabeelaha Hoose, waxaana ka qeybgalay ururrada ciidamada ee 174-aad, 165-aad, 131-aad iyo 12-aad, Cutubka Jugta Culus iyo laba kooxood oo Sancada ah.

    Taliyaha guud ee hawlgalkan ayaa loo magacaabay G/Sare Cadow Maxamed Sahal, 22kii bishan ayaa la ebyay qorshaha howlgalka Banooda, sida kamuuqata gabi ahaantiisba loo qorsheeyey si deg deg badan kamuuqda, khataraha laxusay ayaana la fududeeyey, iyadoo tirada maleeshiyaadka cadowga lagu koobay wax ka yar 600 argagixiso ah.

    23kii bishan 5tii galabnimo ayaa ahayd xiliga uu bilowday dhaqaaqa colalka madaxa 1aad, 14 maalmood in lagu gaaro ebyo ayaa qorshuhu ahaa, iyadoo madaxa 1aad oo Buurhakaba ah iyo kan 2aad oo ka imaanayay Baydhabo ay ahayd in ay iskugu yimaadeen Duleedka Buurhakaba, laakiin taas ma dhicin oo labada madaxba maanta horey u dhaqaaq ma sameynin, iyagoo lakulmay duulaano aan la qorsheynin.

    Saraakiisha Taliska ciidanka ayaa ilaa hadda jahawareer kujiraa xariiradooda qaar kamid ah howlgaliyayaashii madaxa 1aad ee howlgalkan Buurhakaba ayaa sheegaya in ay lakulmeen duulaan aysan fileynin.

← Dhammaan Wararka